Xəbər verdiyimiz kimi, bir müddət öncə Aprel döyüşlərində qəhrəmanlıq göstərərək şəhid olmuş Azərbaycan Silahlı Qüvvələrinin polkovniki Vüqar Yusifovun həyat yoldaşı Lalə Əliyeva redaksiyamıza müraciət edərək narazılığını bildirib. O, şəhidin adının tarix dərsliklərindən çıxarıldığını iddia edib və məsələ ilə bağlı araşdırma aparılmasını tələb edib.
Yenisabah.az mövzu ilə bağlı Elm və Təhsil Nazirliyinə sorğu ünvanlaıb. Nazirlikdən daxil olan rəsmi cavabda qeyd olunub ki, polkovnik Vüqar Yusifovun adı dərsliklərdən çıxarılmayıb.
Qurumun açıqlamasında deyilir:
“Bildiririk ki, "Azərbaycan tarixi 5" dərsliyindən Vüqar Yusifovun adı çıxarılmamış, sadəcə olaraq həmin dərsliyin istifadə müddəti 2024-cü ildə başa çatmışdır. Hazırda ölkəmizin ümumi təhsil müəssisələrində tədris olunan "Zəfər tarixi" dərs vəsaitində isə Vüqar Yusifov və onun döyüş yoldaşlarının düşmənə sarsıdıcı zərbələr endirməsi, eləcə də strateji əhəmiyyətli ərazilərimizi işğaldan azad etməsi ilə bağlı ətraflı məlumatlar yer alır”.
Beləliklə, Elm və Təhsil Nazirliyi şəhid polkovnikin adının dərsliklərdən çıxarılması ilə bağlı yayılan iddiaları təkzib edib və onun qəhrəmanlığına tədris materiallarında layiqincə yer verildiyini vurğulayıb.
