Rusiya FSB-si "Telegram" messencerində rusların Ukrayna çat botlarına göndərdiyi mesajlara giriş əldə edib.
1xeber.media xəbər verir ki, bu barədə “Perviy Otdel” layihəsi məlumat yayıb.
Məlumata görə, rusiyalılar tərəfindən ukraynalı çat-botlara göndərilmiş “gizli məlumatlar” və ya Ukrayna ordusuna maddi dəstək barədə hesabatlar artıq FSB-nin əlinə keçib və bu əsasında “dövlətə xəyanət” maddəsi ilə cinayət işi açılır.
Mesajların ələ keçirilməsi 2022-ci ilin yazında başlanan cinayət işi çərçivəsində həyata keçirilir.
İşi FSB-nin istintaq idarəsinin birinci şöbəsi aparır. Hüquq müdafiəçilərinin bildirdiyinə görə, şəxs saxlanılana qədər onun yazışmaları artıq xüsusi xidmət orqanları tərəfindən oxunmuş olur.
“Bəzi işlərdə məlum olan texniki üsullarla – məsələn, məlumatların könüllü ötürülməsi, sındırma (hacking), fişinq və ya zərərli proqram vasitəsilə – izah oluna bilməyən hallar var. Bu isə ya hələ açıqlanmayan kibercasusluq alətinin istifadəsinə, ya da Telegram-ın Rusiya hakimiyyəti ilə əməkdaşlıq etdiyinə işarə edə bilər. Biz bunun digər sahələrdə də əlamətlərini müşahidə edirik”, – deyə “Perviy Otdel”in hüquqşünası Dmitri Zair-Bek bildirib.
Digər hüquqşünas Yevgeni Smirnov da Telegram-ın etibarlılığı ilə bağlı şübhələrini ifadə edib.
“Perviy Otdel”şəxsi və məxfi ünsiyyət üçün Signal, Session və SimpleX Chat kimi alternativ platformalardan istifadə olunmasını tövsiyə edir./Bizim.Media
