Türkiyənin İnsan Hüquqları və Bərabərlik Qurumunun (TİHEK) sədri Prof. Dr. Fahrettin Altun və rəhbərlik etdiyi nümayəndə heyəti ölkəmizdə işgüzar səfərdədir.
1xeber.media xəbər verir ki,səfər çərçivəsində Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva, Aparatın bir qrup əməkdaşı, Türkiyənin İnsan Hüquqları və Bərabərlik Qurumunun (TİHEK) sədri Prof. Dr. Fahrettin Altun və nümayəndə heyəti, Türkiyənin Azərbaycandakı səfiri Birol Akgün ilə birgə Fəxri Xiyabanı, Şəhidlər Xiyabanını və Bakı Türk Şəhidliyini ziyarət ediblər.
Əvvəlcə Fəxri Xiyabanda Ulu Öndərin məzarı ziyarət edilib, önünə gül dəstələri qoyularaq xatirəsini ehtiramla anılıb.
Görkəmli oftalmoloq-alim, akademik Zərifə xanım Əliyevanın xatirəsi də ehtiramla yad edilib, məzarı önünə çiçəklər düzülüb.
Nümayəndə heyəti Şəhidlər Xiyabanı və Bakı Türk Şəhidliyini də ziyarət edərək, Azərbaycanın azadlığı və ərazi bütövlüyü uğrunda canından keçmiş şəhidlərin xatirəsinə dərin ehtiramlarını bildiriblər.
Daha sonra Ombudsman S.Əliyeva TİHEK-in sədrini və nümayəndə heyətini Ombudsman Aparatında qəbul edib.
Görüşdə Türkiyənin Azərbaycandakı səfiri Birol Akgün iştirak edib.
Görüş zamanı Ombudsman qonaqları salamlayaraq, mandatı, insan hüquq və azadlıqlarının müdafiəsi sahəsində həyata keçirdiyi çoxşaxəli fəaliyyəti barədə qonaqlara ətraflı məlumat verib.
Beynəlxalq təşkilatlarla, eləcə də ombudsman və milli insan hüquqları institutları ilə əməkdaşlıq əlaqələrindən danışan S.Əliyeva Türkiyənin İnsan Hüquqları və Bərabərlik Qurumu ilə sıx əməkdaşlığın mövcud olduğunu, birgə layihələrin həyata keçirildiyini bildirib, bu əlaqələrin daha da inkişaf etdirilməsinin vacibliyini vurğulayıb.
Ombudsman qeyd edib ki, iki qardaş dövlət hər zaman beynəlxalq təşkilatlarda və beynəlxalq səviyyədə həyata keçirilən tədbirlərdə qarşılıqlı olaraq bir-birilərini dəstəkləyirlər.
Ombudsmanın insan hüquq və azadlıqlarının müdafiəsi sahəsində həyata keçirdiyi fəaliyyət, o cümlədən müharibə və postmüharibə dövrlərində həyata keçirilmiş faktaraşdırıcı missiyalar, həmin missiyaların nəticələri əsasında hazırlanmış xüsusi hesabat, bəyanat və müraciətlərlə bağlı məlumatları əks etdirən təqdimatlar qonaqların diqqətinə çatdırılıb, suallar cavablandırılıb.
Türkiyənin İnsan Hüquqları və Bərabərlik Qurumunun (TİHEK) sədri Prof. Dr. Fahrettin Altun öz növbəsində səmimi qəbula görə Səbinə Əliyevaya təşəkkürünü bildirərək, illər ərzində formalaşmış əməkdaşlıq əlaqələrinin və müsbət təcrübə mübadiləsinin davam etdirilməsi istiqamətində səylərini artıracağını vurğulayıb.
Sonda iki ölkə arasında insan hüquq və azadlıqlarının müdafiəsi sahəsində mövcud olan sıx əməkdaşlıq əlaqələrindən məmnunluq ifadə edilib, gələcək əməkdaşlığın perspektivləri barədə ətraflı fikir mübadiləsi aparılıb.
F.Altun və nümayəndə heyəti Vətəndaşların Qəbulu Mərkəzində mövcud şəraitlə tanış olub, həmçinin yerli televiziya kanallarına müsahibə verib.
