Məlumdur ki, Ramiz Mehdiyev barəsində Səbail Rayon Məhkəməsinin qərarı ilə 4 ay müddətinə ev dustaqlığı qətimkan tədbiri seçilib. Bu qərar ictimaiyyətdə müxtəlif suallar yaradıb. Xüsusilə də son günlər “dörd aydan sonra hər şey açıqlanacaq” fikri tez-tez səslənir.
Bu iddiaların hüquqi və ya faktiki əsasları varmı?
1xeber.media xəbər verir ki,Globalinfo.az-a danışan vəkil Asim Abbasov deyib ki, aidiyyəti qurumlar açıqlama verməsə də, mediada yayılan məlumatlardan Ramiz Mehdiyevin ağır maddələrlə ittiham olunduğu görünür:
“274-cü maddə isə xüsusilə ağır cinayətlər kateqoriyasına aiddir. İstintaq müddəti ilə qətimkan tədbiri bir-biri ilə fərqli anlayışlardır. Qətimkan tədbiri cinayət işi üzrə şübhəli yaxud təqsirləndirilən şəxsin qanunsuz hərəkətlərinin qarşısını almaq və məhkəmə hökmünün icrasını təmin etmək məqsədilə tətbiq olunan prosessual məcburiyyət tədbiridir. Bu, məhkəmə hökmü qanuni qüvvəyə minənədək şəxsin davranışlarını nəzarətdə saxlamaq üçün nəzərdə tutulur. Ramiz Mehdiyev barəsində seçilmiş ev dustaqlığı qətimkan tədbiri isə yanlız məhkəmə qərarı əsasında seçilə bilər. Cinayət Prosessual Məcəlləsinin (CPM) 218.2.4-cü maddəsinə əsasən xüsusilə ağır cinayətlər üzrə cinayət işinin başlanmasından ən geci 4 ay keçdikdən sonra istintaq müddətləri tamamlanmalıdır. CPM-nin 218.3-cü maddəsinə əsasən istintaq müddəti cinayət işinin başlandığı gündən hesablanır, işin məhkəməyə göndərilməsi və ya icraatına xitam verilməsi haqqında qərarın çıxarıldığı gün bitir”
Vəkil qeyd edib ki, Ramiz Mehdiyevin xüsusilə ağır cinayətdə ittiham olunduğu üçün 4 aylıq istintaq müddəti müəyyən olunub:
“Lakin istintaq müddətinin uzadılması istisna olunmur. Xüsusilə ağır cinayətlər üzrə son istintaq müddəti 19 ay müəyyən edilib. İstintaq müddətinin uzadılma qaydası 218-ci maddə ilə tənzimlənir. İşin məhkəməyə göndərilməsi anından istintaq müddəti bitir, lakin qətimkan tədbiri hökm qüvvəyə minənədək qüvvədə saxlanılır. Ev dustaqlığından fərqli olaraq, istintaq müddətini yalnız işin ibtidai istintaqını aparan müstəntiqin vəsatəti və müvafiq təqdimatı əsasında həmin orqanının vəzifəli şəxsləri uzada bilər. Ev dustaqlığı müddəti isə yanlız məhkəmə qərarı əsasında uzadıla, başqa qətimkan tədbiri ilə əvəz edilə bilər. Mahiyyət etibarilə Ramiz Mehdiyevin barəsində aparılan cinayət işi ilə əlaqədar istintaq yeni başlanılıb və müddətin uzadılması mümkündür. Yekun məhkəmə hökmü qəbul edilib qüvvəyə minənədək üzərində müvafiq qətimkan tədbiri qüvvədə saxlanılmalıdır. Ev dustaqlığının müddətinin seçilməsi, uzadılması isə həbs qətimkan tədbirinin müddətinin seçilməsi, uzadılması müddəaları ilə tənzimlənir”.
Qeyd edək ki, Ramiz Mehdiyev dövlətə xəyanətdə təqsirli bilinir. O, Cinayət Məcəlləsinin 278.1 (dövlət hakimiyyətini ələ keçirməyə yönələn əməllər), 274 (dövlətə xəyanət) və 193-1.3.2-ci (cinayət yolu ilə əldə edilmiş əmlakı leqallaşdırma) maddələri ilə ittiham olunur. Səbail rayon məhkəməsi Ramiz Mehdiyev barədə 4 ay müddətinə ev dustaqlığı qətimkan tədbiri seçib.
