Oktyabrın 24-də Xocalı rayonunun Seyidbəyli və Daşbulaq kəndlərinə növbəti köç olub.Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin ictimaiyyətlə əlaqələr şöbəsindən verilən məlumata görə, bu mərhələdə ümumilikdə 85 nəfərdən ibarət 26 ailə doğma yurdlarına qayıdıb.
1xeber.media xəbər verir ki,onlardan 61 nəfər (18 ailə) Seyidbəyli kəndinə, 24 nəfər (8 ailə) isə Daşbulaq kəndinə köçürülüb. Seyidbəyli və Daşbulaq kəndlərində sakinlərə mənzillərin açarlarının təqdim edilməsi mərasimində çıxış edən Prezidentin Xankəndi şəhərində, Ağdərə və Xocalı rayonlarında xüsusi nümayəndəsinin müavini Səbuhi Qəhrəmanov bildirib ki, hər iki kənddə müasir infrastruktur qurulub, sakinlərin rahat yaşayışı, sosial rifahı və məşğulluğunun təmin edilməsi dövlətin əsas prioritet istiqamətlərindəndir. S. Qəhrəmanov vurğulayıb ki, kəndlərdə bərpa-quruculuq işləri planlı şəkildə aparılır, müasir yaşayış evləri, məktəb, sosial obyektlər, mühəndis-kommunikasiya xətləri və yeni yollar istifadəyə verilib.
Qeyd edək ki, bu zamanadək Seyidbəyli kəndinə ümumilikdə 119 nəfərdən ibarət 45 ailə, Daşbulaq kəndinə isə 115 nəfərdən ibarət 29 ailə köçürülüb. Böyük Qayıdış proqramı çərçivəsində Xocalı rayonunun digər kəndlərinə də mərhələli şəkildə köç prosesi davam etdiriləcək.
