Türk dünyasının ortaq ədəbi irsini və mədəni birliyini möhkəmləndirən 28-ci “Beynəlxalq Xəzər şeir axşamları” Türkiyənin Elazığ şəhərində böyük təntənə ilə qeyd edilib.
1xeber.media AZƏRTAC-a istinadla xəbər verir ki, Əhməd Teyfik Ozan Sərgi və Konqres Mərkəzində keçirilən tədbir TÜRKSOY-un dəstəyi ilə gerçəkləşib və Türk dünyasının müxtəlif ölkələrindən gələn şairləri, sənət adamlarını və gənc istedadları bir araya gətirib.
Builki poeziya axşamlarında Azərbaycan, Türkiyə, Özbəkistan, Qazaxıstan, Qırğızıstan, Makedoniya və digər ölkələrdən gələn 50-yə yaxın şairin səsləndirdiyi poetik nümunələr Türk milli düşüncəsinin səsinə çevrilib. Onların sırasında Azərbaycan nümayəndə heyəti də öz bədii çıxışları ilə tədbirə xüsusi rəng qatıb.
Azərbaycanı bu mötəbər tədbirdə bir neçə tanınmış ədəbiyyat nümayəndəsi təmsil edib.
Azərbaycan, Türkiyə və Özbəkistan Yazıçılar birliklərinin üzvü, Türk Dünyası Qadın Şairlər Birliyinin başqanı, Türk Dünyası Araşdırmaları Beynəlxalq Elmlər Akademiyasının fəxri professoru, vətənpərvər şairə Xuraman Muradovanın səhnədəki çıxışı böyük coşqu ilə alqışlanıb. Xuraman Muradova “Türkün xanımı” adlı şeirini səsləndirərək Türk qadınının mənəvi gücünü, mədəni irsdəki rolunu və birlik ruhunu poetik dillə ifadə edib.
Tədbirdə Azərbaycan Yazıçılar Birliyinin poeziya bölməsinin rəhbəri, Türk Ədəbiyyatı Vəqfinin fəxri üzvü, şair-publisist İbrahim İlyaslının səsləndirdiyi “Turan yaşasın!” adlı şeir Türk dünyasının birliyini, milli kimliyi və mənəvi həmrəyliyi tərənnüm edərək tamaşaçılar tərəfindən böyük maraqla qarşılanıb.
Azərbaycanı təmsil edən gənc şairlər Elvin Əlizadə və Ramil Əhmədin çıxışları gənc nəsil Azərbaycan poeziyasının yenilikçi ruhunu və müasir ədəbi baxışlarını nümayiş etdirib.
Tədbirdə, həmçinin Mehmet Ömer Kazancı, Leyla Şerif Emin, Nuralı Kabul, İnci Okumuş, Talat Ülker, Mehmet Sümer, Gonca Hatunoğlu və digər ölkələrdən gələn tanınmış şairlər də çıxış edərək Türk dünyasının ədəbi birliyinə poetik töhfələrini veriblər.
Tədbirdə çıxış edən natiqlər - Bilal Ərdoğan, Kürşad Zorlu, Batuhan Mumcu, Numan Hatipoğlu və Şahin Şerifoğulları Türk dünyasında mədəni və ədəbi həmrəyliyin əhəmiyyətini vurğulayıblar.
Final mərasimində “Türk dünyasına xidmət” mükafatları Dünya Etnosport Konfederasiyasının prezidenti Bilal Ərdoğana və Nobel mükafatı laureatı professor Aziz Sancar adına Fırat Universitetinin tələbəsi Yusif Kaan Yıldırıma təqdim olunub.
Builki şeir axşamlarının ərsəyə gəlməsində xüsusi xidmətlərinə görə Türk Ədəbiyyatı Fondunun Başqanı, dəyərli ədəbiyyat xadimi, Türk dünyasının tanınmış şairi Sərhat Kabaklıya iştirakçılar tərəfindən böyük minnətdarlıq ifadə olunub. Onun fədakar dəstəyi və ədəbi missiyası sayəsində “Xəzər şeir axşamları” Türk dünyasının ruhunu və birliyini bir daha yaşadıb.
TÜRKSOY-un dəstəyi ilə həyata keçirilən bu tədbir, türk xalqları arasında mədəni, ədəbi və mənəvi bağların daha da möhkəmlənməsinə xidmət edib. Azərbaycan şairlərinin çıxışları isə gecənin ən yaddaqalan və alqışlarla qarşılanan məqamları kimi dəyərləndirilib.
Elazığın poetik ruhunu ifadə edən “Türk Dünyasının ruhu Elazığda şeirə çevrildi” devizi altında keçirilən builki “Xəzər şeir axşamları” Türk dünyasının ortaq səsi, ortaq duyğusu və ortaq gələcəyinə inamın rəmzinə çevrilib.
