Paytaxtda müşahidə olunan kəskin hava şəraiti və güclü dolu həm sakinlərin, həm də mütəxəssislərin diqqət mərkəzindədir. May ayının sonunda Abşeron yarımadasında buz dənələrinin diametrinin 4 millimetrə çatması yaz fəsli üçün gözlənilməz hadisə hesab olunur.
Ekoloq Ənvər Əliyev mövcud vəziyyəti son onilliklərin iqlim mənzərəsi ilə müqayisə edərək maraqlı məqamlara toxunub. Ekspertin fikrincə, Bakıda təxminən 45 illik quraqlıq mərhələsindən sonra yenidən rütubətli dövr başlayır. Bu keçid özü ilə bərabər müəyyən təbiət hadisələrini də gətirir. Dolunun yaranması atmosferdə isti və soyuq hava kütlələrinin toqquşması, nəticədə yaranan şaquli sirkulyasiya ilə bağlıdır. Hazırda ölkə ərazisində temperatur fərqləri kəskindir. Şəhərdə 30 dərəcəyə yaxın isti olduğu halda, dağlıq rayonlarda qar yağır.
Azərbaycanın coğrafi mövqeyi fərqli iqlim qurşaqlarının kəsişməsində yerləşdiyi üçün burada atmosfer dəyişiklikləri daha qabarıq hiss olunur. Son yarım əsrdə paytaxtda yağıntıların bu qədər intensiv və uzunmüddətli olması nadir hallarda qeydə alınıb. Mütəxəssis baş verənləri hava anomaliyası adlandırır və bənzər mənzərənin yenidən təkrarlanma ehtimalını istisna etmir. Bölgəyə doqquz fərqli istiqamətdən hava axınlarının daxil olması proqnozları çətinləşdirsə də, Atlantik okeanından gələn nəmli kütlələrin təsirinin artması yaxın gələcəkdə də sürpriz hava şəraitinə zəmin yaradır. (pravda.az)
