Bu gün Türk dünyasında “türk” anlayışının ortaq kimlik kimi dəyərləndirilməsi elmi, siyasi və diplomatik müstəvidə geniş müzakirə olunur. Tarixi mənbələr göstərir ki, “türk” sözü yalnız müəyyən bir dövləti deyil, türk dilində danışan bütün xalqları ifadə edən ümumi anlayışdır.
1xeber.media xəbər verir ki, bu fikri UNESCO üzrə Türkiyə Respublikasının Milli Komissiyasının İdarə Heyətinin sədri professor Öcal Oğuz “Türkoloji folklorşünaslıq: nəzəri konteksti, praktik yönləri və təhlil perspektivləri” mövzusunda VIII “Ortaq türk keçmişindən ortaq türk gələcəyinə” beynəlxalq elmi simpoziumunda söyləyib. İdarə Heyətinin sədri diqqətə çatdırıb ki, Göytürk kitabələri türk tarixinin və dilinin ən qədim yazılı abidələrindəndir. Kitabələrdə yer alan “Ey Türk milləti” müraciəti bütün türk xalqlarına ünvanlanıb və ortaq tarixi yaddaşın ən mühüm göstəricilərindən biridir. 2019-cu ildə türk dövlətlərinin birgə təşəbbüsü ilə UNESCO Bilgə Tonyukuk abidəsinin 1300 illiyini beynəlxalq səviyyədə qeyd edib. Bununla da Göytürk kitabələri bəşəriyyətin ortaq mədəni irsi kimi tanınıb və UNESCO-nun yaddaşında əbədi yer alıb.
Çıxışında Mahmud Kaşğarinin irsinə də toxunan professor bildirib ki, türk dövlətlərinin birgə müraciəti əsasında UNESCO böyük türk alimini və onun “Divanü lüğat-it-türk” əsərini bəşəriyyət üçün mühüm mədəni və elmi irs kimi qəbul edib. Bu fundamental əsər türk xalqlarının ortaq dili, folkloru, etnoqrafiyası və mədəni irsi haqqında qiymətli mənbələrdən biridir.
Öcal Oğuz vurğulayıb ki, tarix boyu Aşıq Paşa, Əlişir Nəvai və digər görkəmli mütəfəkkirlər türk dilinin zənginliyini və ifadə imkanlarını yüksək qiymətləndirərək onun qorunmasının vacibliyini öz əsərlərində xüsusi qeyd ediblər. Türk dili müxtəlif coğrafiyalarda fərqli ləhcələrdə yaşasa da, ortaq kökləri və ortaq mədəni yaddaşı ilə türk xalqlarını birləşdirən əsas dəyərlərdən biri olaraq qalır. Azərbaycan, Türkiyə, Qazaxıstan, Qırğızıstan, Özbəkistan, Türkmənistan və digər türk dövlətlərinin təşəbbüsü, eləcə də 26 ölkənin dəstəyi ilə UNESCO tərəfindən dekabrın 15-i “Türk Dili Ailəsi Günü” təsis olunub. Bu qərar türk dillərinin beynəlxalq səviyyədə tanıdılması, qorunması və gələcək nəsillərə ötürülməsi istiqamətində mühüm addımdır.
Çıxışının sonunda professor Öcal Oğuz qeyd edib ki, ortaq tarix, ortaq dil və ortaq folklor Türk dünyasının gələcək inteqrasiyasının əsas sütunlarıdır. Bu irsin qorunması, elmi əsaslarla araşdırılması və UNESCO platformasında təbliği Türk dünyasının gələcək əməkdaşlığı baxımından xüsusi əhəmiyyət daşıyır.
