Azərbaycanda yay mövsümünün pik nöqtəsinə çatması ilə bərabər, daxili turizm sektorunda illərdir xroniki xəstəliyə çevrilən qiymət və xidmət disbalansı yenidən ölkə gündəminin ən çox müzakirə edilən mövzusuna çevrilib. Ölkəmizin dilbər guşələri olan Quba, Qusar, Qəbələ, Şəki və Lənkəran kimi bölgələrdə fəaliyyət göstərən hotel, istirahət mərkəzi və kotteclərin təklif etdiyi qiymətlər bu gün orta statistik Azərbaycan ailəsinin büdcəsini çox-çox aşır.
1xeber.media əməkdaşlarının bölgələrdəki mövcud vəziyyətlə bağlı apardığı monitorinqlər və yerli sakinlər arasında keçirdiyi sorğular acınacaqlı mənzərəni ortaya qoyur: Azərbaycanda bir həftəlik ailəvi istirahətin qiyməti bəzən Türkiyə, Gürcüstan və ya Avropanın məşhur kurort zonalarındakı beşulduzlu hotellərin "hər şey daxil" paketlərindən daha baha başa gəlir.
Məsələnin ən ağrılı tərəfi isə təkcə qiymətlərin fantastik olması deyil, bu qiymətlərin qarşılığında təklif olunan xidmət səviyyəsinin elementar standartlara belə cavab verməməsidir. İstirahət mərkəzlərində bir gecəsi 150-300 manat arasında dəyişən kotteclərdə internet sürətinin aşağı olması, isti suyun mütəmadi kəsilməsi, təmizlik işlərinin bərbad vəziyyətdə qurulması və ən əsası, personalın peşəkarlıq səviyyəsinin sıfıra bərabər olması turistlərin ən çox qarşılaşdığı neqativ hallardır. Bir çox obyektlərdə ofisiantların və qeydiyyat şöbəsi əməkdaşlarının elementar müştəri məmnuniyyəti qaydalarından xəbərsiz olması, qonaqlara qarşı aqressiv və laqeyd münasibəti yerli turizmin imicinə ciddi zərbə vurur.
Turizm ekspertləri bildirirlər ki, bölgələrdəki sahibkarların böyük qismi "qısamüddətli və maksimum qazanc" prinsipi ilə işləyirlər. Yəni, ilin yalnız 3-4 ayında müştəri axınından istifadə edərək bütün ilin gəlirini çıxarmağa çalışırlar ki, bu da süni qiymət artımına yol açır. Digər tərəfdən, peşəkar kadr hazırlığının olmaması regional obyektləri mövsümi və qeyri-peşəkar işçi qüvvəsindən asılı vəziyyətə salır. Nəticədə isə ölkə vətəndaşları öz pulları ilə öz vətənlərində stress yaşamaqdan imtina edərək, maliyyə vəsaitlərini qonşu ölkələrin turizm bazarlarına daşıyırlar. Bu tendensiya isə daxili turizmin inkişaf perspektivlərini ləngidir. Ekspertlər çıxış yolunu xidmət sektorunda ciddi sertifikatlaşdırma sisteminin tətbiqində, hotellərin ulduz dərəcələrinin real xidmətə uyğunlaşdırılmasında və rəqabət mühitinin yaradılmasında görürlər. Əks təqdirdə, yerli turizm mərkəzləri xarici rəqiblərinə uduzmağa davam edəcək.
