Bu gün hər bir insan gün ərzində onlarla xəbər və məlumatla qarşılaşır. Lakin onların hamısı həqiqəti əks etdirmir. Dezinformasiyanın geniş yayıldığı müasir informasiya məkanında etibarlı mənbələri tanımaq və yayılan məlumatları yoxlamaq cəmiyyət üçün ən aktual məsələlərdən birinə çevrilib. Bu isə sadə oxucular qarşısında mühüm sual yaradır.
Bəs etibar ediləcək xəbərlə dezinformasiyanı necə fərqləndirmək olar?
“Demokrat.az” xəbər portalının direktoru, “Ekoloji Dayanıqlılıq və Təbiətin Qorunması” İctimai Birliyinin sədri Vasif Həsənli hit.az-a açıqlamasında deyib ki, bu gün informasiya əldə etmək heç vaxt olmadığı qədər asanlaşıb, ancaq doğru məlumatı seçmək daha da çətinləşib:
“Hər gün qarşılaşdığımız xəbərlərin hamısı heçdə həqiqəti əks etdirmir. Çox təəssüf ki, son illər dezinformasiya və saxta xəbərlər cəmiyyətdə çaşqınlıq yaratmaq, ictimai rəyi manipulyasiya etmək üçün istifadə oluna bilir. Buna görə də hər bir insan oxuduğu xəbərə şübhə ilə yanaşmalıdır. Etibarlı xəbər ilk növbədə peşəkar və tanınmış media qurumları tərəfindən hazırlanır.
Belə xəbərlərdə mənbələr göstərilir, faktlar yoxlanılır və qarşı tərəfin mövqeyinə də yer verilir. Sensasiya xarakterli, emosiyalara hesablanmış və mənbəyi bilinməyən paylaşımlar isə şübhə ilə qarşılanmalıdır. Hər hansı məlumatı yalnız bir mənbədən deyil, bir neçə etibarlı yerdən yoxlamaq daha düzgün yanaşmadır”.
Vasif Həsənli qeyd edib ki, indiki dövrdə istənilən görüntüləri çox asan montaj etmək və ya süni intellektlə saxtalaşdırmaq mümkün olur:
“Ona görə də sosial şəbəkələrdə paylaşılan hər xəbərlər doğru olmaya bilər. Bu səbəbdən də media savadlılığı müasir dövrdə hər bir vətəndaş üçün vacib bacarıqlardan birinə çevrilməlidir. Çünki dezinformasiyaya qarşı ən güclü silah məhz etibarlı mənbələrə üstünlük verməkdir. İnformasiya bolluğu dövründə doğru xəbəri yalan məlumatdan ayırd edə bilmək üçün sadaladığım məsələlərə mütləq diqqət yetirilməlidir”.
