Pekin cümə günü ABŞ Prezidenti Donald Trampın Çinin ABŞ seçkilərinə müdaxilə etdiyinə dair iddialarını rədd edib.
1xeber.media “Sinxua” agentliyinə istinadla xəbər verir ki, Çin Xarici İşlər Nazirliyinin sözçüsü Lin Cian jurnalistlərə bildirib: “ABŞ-nin iddialarının heç bir əsası yoxdur və Çini ləkələmək məqsədi daşıyır”.
Donald Tramp cümə günü iddia edib ki, Çin 2020-ci ildən başlayaraq 220 milyon ABŞ seçicisinin şəxsi məlumatlarını əldə edib. O, bunu tarixdə “seçki məlumatlarının ən böyük oğurlanması” faktı adlandırıb.
Prezident Tramp geniş yayılmış xarici müdaxiləni və ABŞ seçki sistemlərində ciddi zəiflikləri göstərən kəşfiyyat məlumatlarını açıqlayıb.
Lakin ÇİN XİN-in sözçüsü bildirib ki, oxşar ittihamların uzun müddətdir əsassız olduğu sübut olunub. O deyib: “Pekin digər dövlətlərin daxili işlərinə müdaxilə etməmək prinsipinə sadiqdir. Çinin ABŞ seçkilərinə müdaxilə etməkdə heç bir marağı yoxdur və heç vaxt belə etməyib”.
XİN sözçüsü əlavə edib: “Kimin başqa dövlətlərin daxili işlərinə qəsdən müdaxilə etdiyi, uzun müddət ərzində dünya miqyasında hökumətləri, müəssisələri və geniş ictimaiyyəti ayrı-seçkilik etmədən izlədiyi və digər ölkələrin vətəndaşlarının məlumatlarını geniş miqyasda oğurladığı məlumdur”.
ABŞ bu ilin sonlarında - noyabr ayında ara seçkilərə gedir.
Mərkəzi Kəşfiyyat İdarəsinin hesabatına istinad edən Tramp bildirmişdi ki, 2018-ci ilin ortalarında, vəzifədə olduğu ilk müddətdə Çin Kommunist Partiyasının siyasəti 2020-ci il seçkilərində alacağı səsləri azaltmaq, onu istefa verməyə məcbur etmək və ya yenidən seçilməsini əngəlləmək olub.
