Prezident İlham Əliyevin Özbəkistan səfərinin iqtisadi pərdəarxası rəqəmlərin dilində hər iki ölkənin daxili bazarları üçün böyük inqilabi yeniliklər vəd edir. Dövlət başçılarının qarşıya qoyduğu əsas hədəf 2030-cu ilə qədər qarşılıqlı ticarət dövriyyəsini 1 milyard ABŞ dollarına çatdırmaqdır. Ötən il iki ölkə arasındakı ticarətin 3 dəfədən çox artaraq 795 milyon dollara çatması və cari ilin ilk beş ayında əlavə 33 faizlik ticari yüksəliş qeydə alınması bu hədəfin tamamilə real və əlçatan olduğunu sübut edir. Bəs bu nəhəng rəqəmlər sıravi vətəndaşlar və yerli iş adamları üçün real olaraq nələri dəyişəcək?
1xeber.media xəbər verir ki,ilk növbədə, rəsmi danışıqlar zamanı nümayiş etdirilən layihələr portfeli sənayenin demək olar ki, bütün sahələrini əhatə edir. Özbəkistan hökumətinin məlumatlarına görə, tərəflər kənd təsərrüfatı, neft-kimya, tekstil və dağ-mədən sənayesini əhatə edən irimiqyaslı investisiyalar barədə razılığa gəliblər. 500 milyon dollar nizamnamə kapitalı olan Azərbaycan-Özbəkistan İnvestisiya Şirkəti hazırda 7 fərqli böyük sənaye layihəsini maliyyələşdirmək üçün icra mərhələsinə keçib. Özbəkistanda Azərbaycan kapitalı ilə STEAM məktəblərinin qurulması, gips zavodunun işə salınması, gümüş tərkibli filizlərin emalı müəssisələrinin yaradılması daxili istehsalın şaxələndirilməsinə xidmət edir.
Maliyyə sektorunda isə Azərbaycanın ən böyük dövlət banklarından olan ABB-nin Özbəkistanın "Davr Bank"ının 51% səhmini 100 milyon dollardan çox vəsaitlə almaq üçün danışıqları yekunlaşdırması, iki ölkənin bank-maliyyə sistemlərinin tam inteqrasiyası deməkdir. Energetika sahəsində SOCAR-ın Özbəkistanın quru ərazilərində neft-qaz kəşfiyyatı işlərini yekunlaşdıraraq gələn ildən birbaşa hasilat quyularının qazılmasına başlamaq ehtimalı iki ölkənin enerji müstəqilliyini daha da möhkəmləndirəcək. Bu layihələr həm Azərbaycanda, həm də Özbəkistanda minlərlə yeni iş yerinin açılması, ixrac potensialının artması və birbaşa xarici valyuta axını deməkdir.
