“Qırğızıstan bizim üçün çox vacib ölkədir. Qırğızıstan Azərbaycanı Şərqlə birləşdirən, Böyük İpək Yolu üzərində yerləşən və Orta Dəhlizin inkişafında mühüm rol oynayan dövlətdir. Zəngəzur dəhlizi və digər nəqliyyat layihələri ilə birlikdə bu proses Türk dövlətləri arasında inteqrasiya baxımından möhtəşəm bir addımdır”.
Bunu tanınmış siyasi şərhçi Əziz Əlibəyli 1xeber.media-ya açıqlamasında deyib.
O bildirib ki, Azərbaycan və Qırğızıstan arasında müttəfiqliyin dərinləşdirilməsinə start verilib:
“Qırğızıstan Azərbaycanın strateji tərəfdaşıdır. Bu gün logistik imkanlar dünyanın nəbzini, iqtisadi və geosiyasi proseslərin istiqamətini müəyyənləşdirən əsas amillərdən birinə çevrilib. Proses də bizi həmin möhtəşəm nöqtəyə doğru aparır. Qısa müddət ərzində Azərbaycan-Qırğızıstan münasibətlərinin yüksək inkişaf mərhələsinə qədəm qoyduğunun şahidi olacağıq. Qırğızıstan Azərbaycanı beynəlxalq təşkilatlarda, dünyada və Türk Dövlətləri Təşkilatında hər zaman dəstəkləyir. Lakin müttəfiqlik münasibətlərin yeni səhifəsinin açılması deməkdir. Bu yeni səhifə isə özündə mühüm bir mərhələni əks etdirir”.
Aysel Timur
