Sərnişin təyyarəsinin ekonom sinfində onlarla yırtıcı quşun yan-yana oturması sosial şəbəkələrdə yenidən müzakirəyə səbəb olub.
1xeber.media xarici mediaya istinadən xəbər verir ki, söhbət 2017-ci ildə çəkilmiş və sonradan internetdə geniş yayılan fotodan gedir. Görüntüdə təyyarənin orta sıralarında ümumilikdə 80 şahinin yerləşdirildiyi əks olunub. Bildirilir ki, quşların təyyarə biletlərinin pulunu Səudiyyə Ərəbistanından olan şahzadə ödəyib.
Quşların başına xüsusi dəri başlıqlar keçirilib. Şahin ovçuluğunda istifadə olunan bu vasitə quşların görmə imkanını müvəqqəti məhdudlaşdıraraq, ətrafdakı hərəkət, işıq və səslərdən daha az təsirlənməsinə kömək edir. Bunun təyyarə kimi qapalı və səs-küylü məkanda quşların sakit qalması üçün vacib olduğu bildirilir.
İlk baxışdan qəribə görünsə də, Yaxın Şərq ölkələrində şahinlərin təyyarə ilə daşınması qeyri-adi hal hesab edilmir. Bunun əsas səbəbi bölgədə minilliklər boyu davam edən şahinlə ov ənənəsidir. Xüsusilə imkanlı şəxslər və kral ailələrinin nümayəndələri qiymətli şahinlərini özləri ilə səfərlərə aparırlar.
Bəzi Yaxın Şərq aviaşirkətləri hətta şahinlərin sərnişin salonunda daşınmasına icazə verir. Bunun üçün quşların xüsusi sənədlərinin olması tələb edilir. Birləşmiş Ərəb Əmirliklərində son illər ərzində on minlərlə belə quş pasportunun verildiyi qeyd olunur.
Bununla belə, bir təyyarədə eyni anda 80 şahinin daşınması adi hal deyil. Məsələn, bəzi aviaşirkətlər salonda daşına biləcək şahinlərin sayına ciddi məhdudiyyət qoyur. Buna görə də sözügedən səfər zamanı şahzadənin aviaşirkətdən xüsusi razılıq aldığı və ya çarter reysindən istifadə etdiyi ehtimal olunur.
Maraqlıdır ki, hadisənin üzərindən illər keçməsinə baxmayaraq, foto vaxtaşırı sosial şəbəkələrdə yenidən yayılır. Sərnişin kreslolarında sakit şəkildə əyləşdirilmiş 80 şahinin görüntüsü bu gün də internet istifadəçilərinin marağına səbəb olur.
