Bakı və Abşeron yarımadasında torpaq sahəsi alıb fərdi yaşayış evi tikmək istəyənlər üçün ərazinin seçimi büdcə, nəqliyyat rahatlığı, kommunal xətlərin mövcudluğu və infrastruktur kimi amillərdən birbaşa asılıdır. Mərkəzə yaxınlıq qiymətləri qaldırsa da, bir qədər kənar qəsəbələr həm büdcəyə qənaət etmək, həm də rahat yaşayış mühiti qurmaq baxımından geniş imkanlar yaradır.
1xeber.media xəbər verir ki,“Yeni Sabah”ın araşdırmasına əsasən, Abşeronda şəxsi ev tikintisi üçün ən populyar və əlverişli zonalardan biri Xırdalan şəhəri və Masazır qəsəbəsidir. Bakı-Sumqayıt magistralına və yeni salınan mühüm nəqliyyat qovşaqlarına yaxınlığı bu əraziləri dinamik inkişaf edən mərkəzə çevirib. Masazırda torpağın bir sotunun qiyməti ərazinin gölə yaxınlığından və əsas yoldan məsafəsindən asılı olaraq orta hesabla 4,000 – 10,000 manat arasında dəyişir. Xırdalanın daxili hissələrində və ətraf massivlərində isə sotun qiyməti 6,000 – 12,000 manat civarındadır. Bu ərazilərin əsas üstünlüyü məktəb, bağça, superstore kimi sosial obyektlərin bolluğu və şəhərə marşrut xətlərinin sıxlığıdır.
Ekoloji cəhətdən təmiz, təmiz dəniz havası və sakitlik axtaranlar üçün Mərdəkan, Şüvəlan və Şağan zonalı xüsusi cəlbediciliyə malikdir. Son illərdə bura yalnız bağ evi kimi deyil, daimi yaşayış məkanı kimi də böyük tələbat görür. Bu qəsəbələrdə qiymətlər daha yüksəkdir — Mərdəkan və Şüvəlanda prestijli küçələrdə bir sot torpaq 12,000 – 25,000 manat təşkil etdiyi halda, Şağan və ya əsas yoldan bir qədər aralı massivlərdə 6,000 – 10,000 manat civarında pay torpağı tapmaq mümkündür. Qaz, işıq, su infrastrukturunun sabitliyi və yol şəraitinin rahatlığı bu istiqamətin başlıca üstünlükləridir.
Daha sərfəli və büdcəyə uyğun variantlar axtaranlar üçün Hövsan, Zığ və Ramanı massivləri ön plana çıxır. Zığ və Hövsan istiqaməti mərkəzə rahat çıxışı (8 Noyabr prospekti və Zığ şosesi vasitəsilə) ilə seçilir. Hövsanda torpağın sotu 3,000 – 7,000 manat, Ramanı və Savalan massivində isə 2,500 – 5,000 manat arasında təklif olunur. Bu ərazilər geniş torpaq sahəsi almaq və nisbətən az büdcə ilə böyük ev tikmək istəyənlər üçün optimal balans yaradır.
Paytaxtın şimal çıxışında yerləşən Saray və Ceyranbatan qəsəbələri də fərdi tikinti üçün ciddi alternativdir. Saray qəsəbəsində bir sot torpağın qiyməti 3,500 – 8,000 manat arasında dəyişir. Havasının təmizliyi, magistral yola birbaşa çıxışı və torpaq qatının tikinti üçün əlverişli olması bu zonanı xüsusilə gənc ailələr üçün cəlbedici edir.
Torpaq alarkən qiymətlə yanaşı sənədləşmə məsələsinə (Çıxarışın – "Kupça"nın olması və təyinatının "yaşayış məntəqələrinin torpaqları" kimi göstərilməsi) və relyefə diqqət yetirmək vacibdir. Ərazidə qaz, su, elektrik və kanalizasiya xətlərinin mövcudluğu sonradan çəkiləcək əlavə xərclərin qarşısını alır.
