1xeber.media xəbər verir ki, ABŞ-ın vitse-prezidenti Cey Di Vens Rusiyanın dizel yanacağı ilə bağlı razılaşma çərçivəsində Prezident Donald Trampın qərarlarına təsir göstərməsi barədə iddiaları rədd edib.
Vens bu barədə iHeart platformasına müsahibəsində danışıb. O bildirib ki, ABŞ Rusiya ilə bir sıra məsələlərdə fikir ayrılığı yaşasa da, müəyyən sahələrdə əməkdaşlıq edə bilər. Onun sözlərinə görə, tərəflər məsələlərin 50-90 faizində fərqli mövqelərə malik olsalar belə, qarşılıqlı maraqlar əsasında razılaşmalar mümkündür.
Vitse-prezident respublikaçı senator Tom Tillisin Rusiyanın Trampı istədiyi kimi yönləndirdiyi barədə fikirlərinə münasibət bildirərkən deyib ki, heç kim ABŞ prezidentini öz istəyi ilə hərəkət etməyə məcbur edə bilməz.
“Əmin edə bilərəm ki, heç kim ABŞ prezidentini istədiyi kimi idarə etmir. O, vəziyyəti tam realist şəkildə qiymətləndirir”, – deyə Vens vurğulayıb.
O, dizel yanacağı ilə bağlı razılaşmanın iqtisadi səbəblərlə əlaqəli olduğunu bildirib. Vensin sözlərinə görə, Rusiya əvvəllər də dizel yanacağını, o cümlədən Çinə böyük endirimlə satmaq imkanına malik olub. Bu zaman ABŞ-da istehlakçılar yüksək yanacaq qiymətləri ilə üzləşiblər.
Vitse-prezident qeyd edib ki, Donald Tramp yaranmış vəziyyətdən istifadə edərək amerikalı fermerlərin yanacaq xərclərini azaltmağa çalışıb.
Vensin açıqlaması Vaşinqtonun Moskva ilə münasibətlərdə siyasi fikir ayrılıqlarına baxmayaraq, iqtisadi maraqları nəzərə alan əməkdaşlıq imkanlarını qorumağa çalışdığını göstərir.
