Avropa ABŞ-sız böyük savaşa hazırlaşır

NATO-nun şərq cinahında yerləşən ölkələr sərhədlərini və müdafiə imkanlarını fəal şəkildə gücləndirir. Onlar düşünür ki, mümkün münaqişə zamanı müəyyən müddət ərzində Rusiya hücumunu öz qüvvələri hesabına dəf etmək məcburiyyətində qala bilər.

1xeber.media xəbər verir ki, bu barədə "Politiko" məlumat yayıb.

Məlumata görə, Rusiyanın 2022-ci ildə Ukraynaya qarşı genişmiqyaslı işğalının başlamasından sonra NATO-nun şərq sərhədində vəziyyət köklü şəkildə dəyişib:

"Əlavə amillərdən biri də ABŞ-ın müttəfiqləri qarşısındakı öhdəliklərinə yenidən baxıla biləcəyinə dair bəyanatlarından sonra Amerikanın Avropanın təhlükəsizliyində gələcək rolu ilə bağlı yaranan qeyri-müəyyənlik olub. Peyk görüntüləri Rusiyanın Finlandiya və alyansın digər üzv ölkələri ilə sərhədləri yaxınlığında hərbi mövcudluğunu gücləndirdiyini göstərir. Məhz buna görə də region ölkələri istehkamların tikintisini sürətləndirir, silahlanmanı gücləndirir, ehtiyat qüvvələrini genişləndirir və hərbçilərin hazırlığını artırırlar".

Nəşr xüsusilə Finlandiyaya diqqət çəkir:

"Çünki Finlandiya NATO üzvləri arasında Rusiya ilə ən uzun quru sərhədinə (1300 kilometr) malik ölkədir. Avropanın əksər ölkələrindən fərqli olaraq, Finlandiya Soyuq müharibə başa çatdıqdan sonra da məcburi hərbi xidməti saxlayıb və ümumi müdafiə konsepsiyasını inkişaf etdirib".