ABŞ hökuməti süni intellektə etibar etdi – Dövlət proqramları AI ilə yoxlanılır

 ABŞ hökuməti ilk dəfə olaraq dövlət informasiya sistemlərinin təhlükəsizliyinin yoxlanılması üçün süni intellektdən genişmiqyaslı istifadə etməyə başlayıb.

1xeber.media xəbər verir ki, Reuters-in yaydığı məlumata görə, ABŞ-nin Kibertəhlükəsizlik və İnfrastruktur Təhlükəsizliyi Agentliyi (CISA) Anthropic şirkətinin Mythos adlı süni intellekt modelini dövlət proqram təminatında mövcud təhlükəsizlik boşluqlarının aşkarlanmasına cəlb edib. Auditlər CISA-nın Attack Surface Evaluation komandası tərəfindən həyata keçirilir.  

Məlumata əsasən, sistem artıq müxtəlif dövlət proqramlarında çoxsaylı proqram təminatı boşluqlarını aşkar edib. Təhlükəsizlik səbəbindən hansı qurumların və proqramların yoxlanıldığı açıqlanmır.  

Qeyd olunur ki, Anthropic ilə ABŞ hökuməti arasında son aylarda müəyyən fikir ayrılıqları yaşansa da, şirkətin süni intellekt texnologiyalarına maraq davam edir. Məlumata görə, ABŞ Milli Təhlükəsizlik Agentliyi (NSA) də bu modeli daha əvvəl sınaqdan keçirib və müsbət nəticələr əldə edib.  

Mütəxəssislər hesab edirlər ki, dövlət proqramlarının təhlükəsizlik auditində süni intellektdən istifadə kibertəhlükələrin daha operativ aşkarlanmasına və kritik infrastrukturun qorunmasına imkan verə bilər. Bununla yanaşı, belə texnologiyaların istifadəsi ilə bağlı etik və təhlükəsizlik məsələləri də beynəlxalq müzakirələrin əsas mövzularından biri olaraq qalır.