Rusiya MN: Gün ərzində 41 Ukrayna PUA-sı zərərsizləşdirilib

1xeber.media xəbər verir ki, Rusiya Müdafiə Nazirliyi Ukrayna Silahlı Qüvvələrinin pilotsuz uçuş aparatları (PUA) vasitəsilə Rusiyanın müxtəlif bölgələrinə, o cümlədən Krıma hücum cəhdləri etdiyini açıqlayıb.

Nazirliyin məlumatına görə, hava hücumundan müdafiə (HHM) qüvvələri Krımla yanaşı Belqorod, Bryansk, Kursk və Rostov vilayətləri, həmçinin Krasnodar diyarı, Qara dəniz və Azov dənizi akvatoriyaları üzərində Ukraynaya məxsus pilotsuz uçuş aparatlarını aşkar edərək zərərsizləşdirib.

Bildirilib ki, hücum cəhdləri Moskva vaxtı ilə saat 08:00-dan 20:00-dək qeydə alınıb. Rusiya Müdafiə Nazirliyinin iddiasına əsasən, ümumilikdə 41 PUA məhv edilib.

Qeyd edək ki, bu məlumat yalnız Rusiya Müdafiə Nazirliyinin açıqlamasına əsaslanır və müharibə şəraitində tərəflərin səsləndirdiyi məlumatları operativ şəkildə müstəqil mənbələr vasitəsilə təsdiqləmək mümkün olmaya bilər.

Xatırladaq ki, daha əvvəl Belqorod vilayətində Ukrayna PUA-sının xidməti mikroavtobusa zərbə endirməsi nəticəsində bir nəfərin ağır yaralandığı bildirilmişdi. Rusiya rəsmilərinin məlumatına görə, hadisə zamanı zərərçəkənin qolu amputasiya olunub və o, bel nahiyəsindən qəlpə xəsarətləri alıb.