Çində elektromobillərin sürətli artımı yeni problem yaradıb: Yürüşə görə ödəniş tətbiq oluna bilər

1xeber.media xəbər verir ki, Çində elektromobillərin sürətlə yayılması gözlənilməz problemlərə səbəb olub. Ölkədə istehsal olunan yeni elektromobillərin getdikcə daha iri və ağır olması yerli büdcələr üçün əlavə maliyyə yükü yaradıb.

2026-cı ilin ilk altı ayında istehsal edilən avtomobillərin 60 faizi uzunluğu 5 metrdən artıq olan modellərdən ibarət olub. Bu cür ağır nəqliyyat vasitələri yolların daha tez aşınmasına səbəb olur və onların təmiri üçün xərcləri artırır.

Bundan başqa, elektromobillərin sayının artması yanacaq vergisindən əldə olunan gəlirlərin azalmasına gətirib çıxarıb. Bu səbəbdən Çin hakimiyyəti yanacaq vergisinin əvəzinə avtomobillərin qət etdiyi məsafəyə əsaslanan yeni ödəniş sisteminin tətbiqini müzakirə edir.

Mütəxəssislərin fikrincə, yürüşə görə ödəniş mexanizmi həm dövlət büdcəsinin itirilən gəlirlərini bərpa etməyə, həm də ağır avtomobillərin yol infrastrukturuna vurduğu ziyanın qarşılanmasına imkan verə bilər.

Qeyd edək ki, Çin elektromobil bazarında dünya liderlərindən biridir və ölkədə elektrik avtomobillərinin istehsalı və satışı artmaqda davam edir.