Merz seçkilərdən qorxur: hakimiyyəti itirə bilər

Almaniya kansleri Fridrix Merzin partiyasının regional seçkilərdən sonra ölkədə hakimiyyəti itirə biləcəyindən narahat olduğu bildirilib.

1xeber.media xəbər verir ki, bu barədə Bavariya parlamentində “Almaniya üçün Alternativ” (AfD) fraksiyasının rəhbəri Ulrix Zinger açıqlama verib.

Onun sözlərinə görə, AfD ilk dəfə federal torpaqlardan birində hökumət formalaşdırsa və ölkədə xaos yaranmadığı, əksinə bəzi sahələrin daha yaxşı işlədiyi görünsə, bu, “domino effekti” yarada bilər.

Zinger bildirib ki, AfD-nin idarəçilik qabiliyyətinin olmadığı barədə illərdir fikirlər səsləndirilir. Onun fikrincə, uğurlu AfD hökuməti bu arqumenti aradan qaldıra bilər.

Siyasətçi partiyasının Almaniyanın maraqlarını əsas götürdüyünü, eskalasiya əvəzinə diplomatiyanı və ölkə iqtisadiyyatına zərər vuran sanksiyaların ləğvini müdafiə etdiyini deyib.

O əlavə edib ki, hakimiyyət seçkilər ərəfəsində bu mövqeni “Rusiyapərəst” kimi təqdim etməkdə maraqlıdır.