Fin siyasətçidən NATO-ya sərt ittiham: “Tarixi səhv etiraf edilməlidir”

1xeber.media xəbər verir ki, Finlandiyalı siyasətçi Armando Mema NATO-nun genişlənməsini “tarixi səhv” adlandırıb.

“Azadlıq Alyansı” partiyasının üzvü olan Mema X sosial şəbəkəsində yazıb ki, NATO-nun genişlənməsinin tarixi səhv kimi qəbul edilməsi gələcək sülh danışıqları üçün əsas prinsiplərdən birinə çevrilə bilər.

Onun sözlərinə görə, həqiqət inkar edildiyi müddətdə sülhə nail olmaq çətin olacaq.

Mema NATO-nun Rusiya sərhədlərinə doğru genişlənməsini də tənqid edib. Siyasətçi tarixdə alyansın ekspansionist siyasət yürütdüyünü göstərən çoxsaylı faktların olduğunu iddia edib və NATO-nun müdafiə deyil, hücum xarakterli alyans olduğunu bildirib.

O qeyd edib ki, gələcək sülh danışıqlarında NATO-nun genişlənməsinin nəticələrinin açıq şəkildə müzakirə edilməsi vacibdir.

Qeyd edək ki, daha əvvəl NATO-nun Avropada nüvə çəkindirmə imkanlarının genişləndirilməsi ilə bağlı planlar hazırladığı bildirilmişdi. Ekspertlər ABŞ-ın B61-12 tipli nüvə bombalarını Böyük Britaniyadakı Laykenhit aviabazasına yerləşdirmiş ola biləcəyini istisna etmirlər. Təhlükəsizlik vəziyyətinin daha da gərginləşməsi halında Polşa, Finlandiya və Litvanın da mümkün yerləşdirmə məkanları kimi nəzərdən keçirilə biləcəyi qeyd olunub.