Şaanşi əyalətinin nəqliyyat və logistika sahəsi üzrə nümayəndə heyəti “Abşeron Logistika Mərkəzi”ndə

Çin Xalq Respublikasının Şaanşi Əyalət Nəqliyyat Departamenti, "Shaanxi Rail Transit Group Co., Ltd., Xi'an Chanba International Port Administrative Committee" və "Xian Free Trade Port Construction and Operation Co., Ltd." nümayəndələrindən ibarət heyət Azərbaycana səfəri çərçivəsində "Abşeron Logistika Mərkəzi"ni ziyarət edib.

Görüşdə Prezident İlham Əliyevin rəhbərliyi ilə Azərbaycanın “Bir kəmər, bir yol” təşəbbüsündə fəal iştirakı və bu təşəbbüs çərçivəsində ölkələr və regionlar arasında nəqliyyat-logistika əlaqələrinin gücləndirilməsi istiqamətində görülən tədbirlər xüsusi qeyd olunub. Bildirilib ki, Prezidentin rəhbərliyi ilə ölkənin tranzit və logistika imkanlarının inkişaf etdirilməsi, nəqliyyat infrastrukturunun modernləşdirilməsi istiqamətində həyata keçirilən tədbirlər Azərbaycanı Avrasiya nəqliyyat şəbəkəsinin mühüm qovşaqlarından birinə çevirir.

Görüş çərçivəsində nümayəndə heyətinə Abşeron Logistika Mərkəzinin fəaliyyəti, logistika infrastrukturu və Orta Dəhliz üzrə həyata keçirdiyi əməliyyatlar barədə ətraflı məlumat verilib. Azərbaycanın ilk beynəlxalq sertifikatlaşdırılmış logistika mərkəzi olan Abşeron Logistika Mərkəzinin Çin, Mərkəzi Asiya, Xəzər regionu və Avropa arasında nəqliyyat-logistika əlaqələrinin inkişafındakı rolu diqqətə çatdırılıb.

Görüş zamanı Orta Dəhlizin inkişafı, dəmir yolu ilə yükdaşımaların artırılması, logistika mərkəzləri və beynəlxalq limanlar arasında əməkdaşlığın genişləndirilməsi, habelə Trans-Xəzər Beynəlxalq Nəqliyyat Marşrutu üzrə yük axınlarının səmərəli və dayanıqlı təşkili istiqamətində əməkdaşlıq imkanları müzakirə olunub. Tərəflər nəqliyyat və logistika, dəmir yolu daşımaları və limanların fəaliyyəti sahələrində qarşılıqlı təcrübə mübadiləsinin əhəmiyyətini vurğulayıblar.

Tərəflər arasında əməkdaşlığın inkişaf etdirilməsinin “Bir kəmər, bir yol” təşəbbüsü çərçivəsində Çin-Azərbaycan ticarət-logistika əlaqələrinin genişlənməsinə töhfə verəcəyi qeyd olunub. Həmçinin, bu əməkdaşlığın Orta Dəhlizin regional nəqliyyat marşrutu kimi mövqeyinin daha da gücləndirilməsinə xidmət edəcəyi bildirilib.