Kosta: Aİ Rusiyaya diplomatik kanalı açıq saxlayır

1xeber.media xəbər verir ki, Avropa İttifaqı (Aİ) Rusiya ilə diplomatik əlaqə kanalını açıq saxlayır və Moskva zəruri hesab edərsə, bu imkandan istifadə edə bilər.

Avropa Şurasının Prezidenti Antonio Kosta bu barədə Rapporteur nəşrinə müsahibəsində bildirib.

Onun sözlərinə görə, Rusiya atəşkəsə nail olmaq, mülki əhalini və enerji obyektlərini qorumaq məsələlərini müzakirə etmək istəsə, diplomatik kanaldan istifadə edə bilər.

“Bu kanal açıqdır və Rusiya atəşkəsə necə nail olmaq, mülki əhalini və enerji obyektlərini necə qorumaq barədə həqiqətən müzakirələr aparmaq istədikdə bunu edə biləcəyini bilir”, – deyə Kosta qeyd edib.

Nəşrin məlumatına görə, söhbət Aİ ilə Rusiya arasında əvvəllər yaradılmış qeyri-rəsmi diplomatik əlaqə kanalından gedir. Bu əlaqələrin Avropa Şurası Prezidentinin aparat rəhbəri Pedro Lurtinin vasitəçiliyi ilə qurulduğu bildirilir.

Aİ-nin Ukrayna üzrə xüsusi nümayəndə təyin etmək planlarına da toxunan Kosta Avropanın nizamlanma prosesində iştirakının danışıqların xarakterindən asılı olduğunu vurğulayıb. O bildirib ki, bəzi hallarda xüsusi nümayəndədən, digər hallarda isə diplomatik və siyasi kanallardan istifadə edilə bilər.

Bundan əvvəl Rusiya Prezidentinin mətbuat katibi Dmitri Peskov ABŞ-ın Ukrayna münaqişəsinin nizamlanması üçün fəal səylər göstərdiyini, Avropanın isə böhranın gərginləşməsinə töhfə verdiyini iddia edib. Peskov bəzi Avropa ölkələrinin Moskvanın narahatlıqlarını anlamağa çalışmasını müsbət tendensiya kimi qiymətləndirsə də, bu istiqamətdə irəliləyişin məhdud olduğunu bildirib.