MDB Hökumət Başçıları Şurasının Minskdə keçirilən iclası zamanı Türkmənistan birlik çərçivəsində artan təsiri öz təsdiqini tapıb.
1xeber.media xəbər verir ki, bu barədə “Türkmənistan” agentliyi məlumat yayıb.
Agentliyin yazdığına görə, iclasda qəbul edilən strateji qərarlar MDB ölkələrinin iqtisadi-texnoloji inteqrasiyasını sürətləndirməyə yönəlib, bu da Türkmənistanın milli maraqlarına uyğundur:
“Türkmənistan nümayəndə heyətinin dəstəklədiyi əsas sahələrdən biri Multimodal Nəqliyyat Dəhlizlərinin Rəqəmsallaşdırılması Strategiyasının təsdiqi olub. Bu qərar beynəlxalq daşımaları və tranziti optimallaşdırmaqla ölkənin Şərqlə Qərb, eləcə də Şimalla Cənub arasında əsas tranzit qovşağı kimi mövqeyini əhəmiyyətli dərəcədə gücləndirəcək.
Bundan başqa, iclas iştirakçıları MDB-nin 2030-cu ilə qədər İqtisadi İnkişaf Strategiyasının ikinci mərhələsinin həyata keçirilməsi üzrə Tədbirlər Planını təsdiqləyiblər ki, bu da ölkələr arasında investisiya və sənaye əməkdaşlığının gücləndirilməsi və onların iqtisadiyyatlarının rəqəmsallaşdırılmasının sürətləndirilməsi üzrə tədbirləri özündə əks etdirir. MDB ölkələri həmçinin 2035-ci ilə qədər elmi-texniki inkişafın uzunmüddətli strategiyasını təsdiqləyiblər, bu da birgə innovasiyalar üçün yeni imkanlar açacaq.
Diqqətçəkən məqam MDB Dövlət Başçıları Şurasının növbəti iclasının 2026-cı ildə Aşqabadda keçirilməsi qərarı olub ki, bu da Türkmənistanın MDB çərçivəsində siyasi-iqtisadi dialoqun gücləndirilməsində əsas rolunu və ölkəni əsas beynəlxalq əməkdaşlıq platformasına çevirmək səylərini təsdiqləyir”.
