2025-ci ilin birinci rübündə Azərbaycanda avtomobil kreditlərinin orta illik faiz dərəcəsi 12 faiz təşkil edib. Bu, ötən ilin sonundakı göstəricidən 2 faiz yüksəkdir. Hazırkı proses isə maşın almaq istəyənlər tərəfindən diqqətlə izlənilir.
Avtomobil kreditləri niyə bahalaşıb? Bu,maşın bazarına necə təsir edəcək?
1xeber.media xəbər verir ki,Globalinfo.az-a danışan iqtisadçı Natiq Cəfərli deyib ki, avtomobil kreditlərinin bahalaşmasının səbəbi tələbatın artması ilə bağlıdır:
“Nağd satışlar xeyli azalıb və vətəndaşlar avtomobilləri daha çox kreditlə əldə etmək istəyirlər. Bu, həm də taksi xidmətlərinin yenilənməsi ilə əlaqəlidir. Bilirsiniz, taksi xidmətlərinə ötən il məhdudiyyətlər gətirildi və maşınlar yeniləndi. Bununla da, taksi üçün istifadə olunan avtomobillərin kreditlə satışı artdı və faizlər yüksəldi”.
Nəqliyyat eksperti Eldəniz Cəfərov bildirib ki, sözügedən kreditlərin bahalaşması yeni avtomobillərə tələbatı azaldacaq, köhnə maşınlarla bağlı əks proses müşahidə olunacaq:
“Bu da Azərbaycan Avtomobil Parkında yenə köhnə maşınların sayını artıracaq. Onsuz da yeni avtomobil almaq çətin idi. Çünki 2016-cı ildə olan devalvasiyadan sonra dollara nisbətdə manatın dəyər itirməsi bazarda olan avtomobillərin qiymətini yüksəltdi. Məsələn, 19 min manata satılan maşının qiyməti 30 min manat oldu. Təbii ki, bu da insanları köhnə nəqliyyat vasitəsi almağa sövq etdi. Beləliklə də, Azərbaycan Avtomobil Parkında köhnəlmə baş verdi”.
Ekspertin sözlərinə görə, eyni zamanda ölkəyə idxal olunan ekoloji cəhətdən təmiz nəqliyyat vasitələrinə kredit şərtləri sadələşdirildi:
“Həm ilkin, həm də illik ödənişlərin faizi aşağı endirildi. Bu zaman xüsusən, hibrid və elektromobillərə maraq artdı. Bank faizlərinin yüksəlməsi həm satışları azaldacaq, həm də vətəndaşlar daha çox köhnə avtomobillərə üstünlük verəcəklər”.
