1xeber.media xəbər verir ki, Hindistan Xarici İşlər Nazirliyi Odessada dənizçilərin ölümü ilə bağlı Rusiyanın müvəqqəti işlər vəkili Vladimir Ladanovu görüşə çağırıb.
Hindistan XİN-in rəsmi saytında yayılan açıqlamada bildirilib ki, görüş zamanı Hindistan tərəfi narahatlığını ifadə edib və 19 iyul 2026-cı ildə MV Golden Leo ticarət gəmisinə baş verən hücumu pisləyib.
Açıqlamada qeyd olunur ki, hadisə nəticəsində 4 Hindistan vətəndaşı həyatını itirib.
Hindistan Xarici İşlər Nazirliyi bildirib ki, bu cür hücumlar beynəlxalq dəniz ticarətinin təhlükəsizliyinə və sabitliyinə mənfi təsir göstərir. Nazirlik ticarət gəmilərinə qarşı hücumların qarşısının alınmasının vacibliyini vurğulayıb.
Bundan əvvəl Rusiya Müdafiə Nazirliyi iyulun 19-na keçən gecə Rusiya qüvvələrinin Kiyevdə hərbi-sənaye obyektlərinə və logistika mərkəzlərinə, eləcə də Odessa vilayətinin "Yujnıy" limanının hərbi təyinatlı yüklərin daşınması və saxlanması üçün istifadə olunan infrastrukturuna zərbələr endirdiyini açıqlamışdı.
Qeyd: Hadisə ilə bağlı tərəflərin açıqlamaları fərqlənə bilər və məlumatlar müstəqil mənbələr tərəfindən tam təsdiqlənməyib.
